【假如此刻夜空有流星飛過…】
唔……應該點樣講好呢？
我深信，我係好喜歡社工呢份工作，亦好喜歡我宜家工作呢間機構…
好似今日返9：00am，放6：30pm，除咗中午用十五分鐘食咗個杯麵同飲咗罐咖啡外，基本上都冇乜點停過…
遇見每一位服務使用者，我都會盡力去幫助佢哋…
但點解我宜家坐喺肥媽床邊，望住熟睡中嘅佢，心情會咁忐忑不安？咁難過？
今日中午，院舍護士打俾我，話醫院打嚟通知肥媽要提前喺5/9/17覆診…
我同護士講，本來肥媽就係嗰日覆診，而當日我亦已安排放假…
前日護士幫肥媽抽血交咗去醫院，佢同我都估計，肥媽啲血可能有啲問題…
我，經常盡力去幫助人哋，但點解我幫唔到肥媽？
靜靜雞話你知，每晚我都差唔多搭尾班地鐵返屋企…
有時想早一班車走，但肥媽總係有啲事，一係咳唔停，一係有大便…
更曾試過發燒、嘔奶…
好多時我會跑去搭尾班車…
但有幾次唯有搭的士走…
每晚我都凌晨1：15後先返到屋企，餵貓、煲水、洗衫、晾衫，通常凌晨2：30先瞓…
第二朝，六點幾又起身…
我已習慣，每晚只瞓三至四個半鐘…
呢個習慣已維持近十二年…
體力仲可以應付，但心靈實在好痛苦…
日唞笑臉迎人、投入工作嘅我，晚上嚟到院舍依然會喺肥媽面前保持幽默笑容，但內心就隱隱作痛…
最痛苦係嗰種望住肥媽越嚟越瘦、身體越嚟越弱、手腳越嚟越冇力、咳嗽輕瀉一直唔斷尾，但我幫佢唔到減輕痛苦嗰種難受…
我好驚肥媽會隨時唔要我，離我而去…
我實在唔敢再諗落去…
後日，係我四十歲生日…
假如天上有流星出現，請通知我一聲好嘛？
抱歉要大家聽我呻，我又係時候準備幫肥媽沖涼…
真係好對唔住！我實在太冇用喇！
Search